預算案豪擲240億　每人注資六千入強積金　六十五歲先攞得

財政司長曾俊華公布二〇一一至一二年度財政預算案，喺七百一十三億元巨額盈餘之下，拒絕好似過去三年咁向納稅人直接退稅，取而代之豪擲二百四十億元，向逾三百萬名持有強積金或公積金戶口人士一次過注資六千蚊——不過要年滿六十五歲先攞得。

點解唔退稅、改為注資強積金？

驚刺激通脹。曾俊華解釋，預測二〇一一年全年平均通脹率高達百分之四點五，係九七年以嚟最高，「相當大威脅」。為免退稅增加消費意欲加劇通脹，佢提出一籃子紓緩措施，相信唔會加劇通脹之餘，仲可令綜合消費物價指數下降百分之一點四、甲類消費物價指數降低百分之二點二。佢又話，退稅只會令少數納稅人受惠最大，注資強積金就惠及逾三百萬打工仔，係「投資未來」。被問到年薪千萬嘅「打工皇帝」都攞到公帑注資，佢反問：「打工皇帝有幾多個呢？」

各界點睇？

政黨齊轟唔收貨。民主黨、民建聯、自由黨、公民黨等主要政黨齊轟「不退稅、只注強積金」未惠及各階層。民主黨形容政府「三守」——守財奴、看守、保守，注資強積金係「蜑家雞見水……有得睇、無得飲」。港大民調顯示，市民對呢份預算案評分平均五十一點五分，係曾俊華四份預算案以嚟最低分。

學者：好心做壞事。恒生管理學院商學院院長蘇偉文認為，退稅刺激通脹大幅升溫機會唔大，強積金制度遭人詬病，政府大額注資係「好心做壞事」，政治上容易被攻擊，建議注資同時必須盡快改革強積金制度。社區組織協會主任何喜華批評注資係胡亂花費公帑，「五無」基層勞工（冇領綜援、冇交稅、冇住公屋、冇子女、冇交差餉電費）完全受惠唔到。

值得留意嘅係，公積金戶口成員要另開一個強積金戶口，先可以確保六十五歲時領取注資；政府消息人士話，最快明年首季先過數。

想知注資之後戶口有咩基金揀，可以去強積金基金比較睇下。