財政預算案公布後，大眾焦點除咗六千元，強積金制度都成為箭靶。市民早已對「回報低、收費高」怨聲載道，「注資六千元」更加火上加油。作者存菁認為，政府除咗盡快推行強積金「半自由行」，仲有必要推動強積金改革，全面檢討優化制度：推行「全自由行」、引入指數基金、鼓勵自願供款，先可以力臻完善。
點解收費咁難減？
因為只有僱主有得揀，僱員冇得問。強積金管理收費高昂，有啲每年接近2%——歸根究底，係因為只有僱主先有選擇受託人公司嘅權利，僱員無權過問，窒礙公司之間競爭。「僱員自選安排」容許僱員就自己供款部分自行選擇受託人，但作者認為應該更進一步推行「全自由行」：等僱員可以就戶口內所有資金自選受託人，一來加強競爭減收費，二來等僱員集中資金方便管理。
點樣改善回報？
強制加入指數基金，逼受託人減費。作者參考部分主動型基金歷年回報，發現往往被管理費蠶食，跑輸相關指數（例如中國股票基金對恆生國企指數）。政府理應強制受託人將指數基金（例如追蹤恆指嘅盈富基金）列入強積金計劃，畀市民多個回報穩健、收費低廉嘅選擇，逼使受託人減收管理費同行政費。
自願供款點先有人肯供？
回報合理加收費低廉，先重拾信心。強積金供款過低，單靠勞資各5%（上限1,000元）杯水車薪。要鼓勵僱員做強積金自願性供款，大前提係提供合理回報同低廉收費，令佢哋重拾信心；當局亦可以透過免稅額鼓勵自願供款。作者又批評積金局公眾教育乏善足陳——除咗嘉年華同30秒電視廣告，基本上冇乜作為，升斗市民對複雜投資概念一知半解，遑論賺取回報。
「十年人事幾番新」，強積金推行十年，政府有必要審時度勢全面優化，將市民未來生活保障放喺首位。
想比較邊間受託人收費最平，可以去強積金基金比較睇下。
