IFC外望——艾爾敦大公子加盟滙豐

九月 25, 2016
Eddie Choy

滙豐香港區零售銀行及財富管理業務主管欣格雷自擔任此職後,噚日首度向本地媒體介紹佢多籮籮嘅重點工作,現今數碼銀行服務咁重要,喺佢嘅重點工作之中,一定唔會少咗數碼服務發展啦!正因為咁,佢帶多咗個人出席,佢係一位外籍人士,換卡片時發現佢個名叫做Andrew Eldon,中文名譯為艾俊安,見到佢嘅姓氏,令人有點熟悉,諗落咪即係同前任滙豐亞太區主席艾爾敦(David Eldon)同姓?

  雖然從外形睇唔出,但細問一下,原來佢果然同艾爾敦有關係,小Eldon就是大Eldon嘅大公子,過往也曾聽艾爾敦提起過佢個仔,現時一睹其廬山真面目,予人感覺,有其父親嘅穩重。

  小Eldon喺今年1月加入滙豐,出任香港區零售銀行及財富管理業務電子服務平台主管,負責銀行和財富管理方案的電子化工作。佢未加入滙豐之前,係一家網上零售商的營運總監,業務覆蓋200多個市場,以38種語言推介多個優質品牌。佢又曾成立一家專業服務顧問公司,專門協助企業改善網上業務。2007年時,佢負責管理一家銀行的公共網站重建工作,包括更新資訊架構、設計和採集渠道管理,從而加入銀行業。滙豐有福了,羅致到呢位人才。

  其實,下一代與上一代服務同一家機構並非新鮮事,尤其英資機構更常見,正如前財爺彭勵治曾在太古工作,其子現也是在太古旗下港基工程工作。

友邦優惠鼓勵愛心企業

  社會共融,人人有責,友邦強積金除咗加強無障礙服務之外,更採用銀彈策略鼓勵企業聘用殘疾人士。乜攻勢咁巴閉?友邦強積金公佈,若企業客戶聘請一名或以上殘疾人士,其僱員採用友邦旗下嘅全球基金或環球債券基金,原價收費為0.99%,符合資格則每年可享0.1%管理費回扣,鼓勵大家接納殘疾人士,用行動證明建立共融社會比賺錢更重要。

  友邦強積金行政總裁馮裕祺(Stephen)出席活動時話,為咗幫助殘疾人士,友邦仲推出手語視像客戶服務、無障礙網頁及在客服中心增設輔助工具。Stephen仲好高興咁分享,友邦亦有身體力行聘用殘疾人士,當中包括一位提供手語服務嘅聽障職員,幫人之餘,Stephen自己都有得着,就係學識幾句手語,嘗試同佢哋「以手交心」啊。

高瞻