早前環球股市暴跌，唔單止股票傳出燶味，更令全港打工仔強積金勁蝕，積金局今日（11月19日）喺網上發表報告指，截至今年9月底，強積金總資產值跌至5613.46億元，短短半年間強積金供款人合共蝕咗大約564億元，足足蝕成9.3%；同時，每名打工仔平均累積207,062元強積金，比4月初時嘅219,419元大縮水，減少大約12,000元。據悉，本港截至今年9月底，有約271萬名僱員及自僱人士須供強積金，積金局發表強積金投資表現統計摘要，強積金總資產值為5613.46億元。而強積金實施15年，受過去半年業績見紅拖累，強積金扣除行政開支後，截至9月底平均每年回報率得2.7%，比起 6月底時嘅4.5%少近一半。

 

各類基金中，以股票基金表現最差，過去一年回報率下跌到6.7%；混合股票基金跌到去5.8%、債劵基金跌至2.2%，強積金保守基金就錄得0.1%回報率咁多；貨幣市場基金同其他基金都有少少地，0.1%升幅咁多。而保證基金則僅僅打個和，冇升冇跌。好可惜，過去一年本港通脹率係2%，上述6類基金全部跑輸大市。

 

不過積金局呢份最新報告就仲未有10月份嘅統計數字，但據知名嘅基金研究機構湯森路透理柏，早前公佈嘅資料顯示，其實打工仔強積金都蝕唔晒。據悉本港上月受日股、A股、美股同港股基金彈升帶動，上月強積金整體表現按月錄4.66%增長，即每名強積金成員賺約6,990元。不過唔知大家退休嗰時，香港通脹係幾多喇！