上星期三講「基建明益下一代」，內有提及今天之80後及90後年輕人，對所有目前基建超支並無多大損失，因為佢哋最多只係開始交稅冇幾耐，稅款唔多，最孭飛重嘅就係啲60後、70後（即36歲至55歲之納稅人）呢班人，正值精壯之年，賺錢黃金時期，開始交稅最多，而更老啲嘅（55歲以上）就已經交稅起碼30年，歷年累積稅款可觀，特區政府之財政儲備就有不少係佢哋嘅血汗錢。基建全部落成之後，無論如何延期、超支，享受利益嘅就係今天之80後、90後，正是父母一代出錢建設，仔女一代享福。到2020年，1995年出生嘅人士係25歲，揸車經港珠澳大橋去珠海，由大嶼山出發，據講係20幾分鐘，快過去中環，1960年出生嘅，已經60歲，或者已無興趣揸車遠遊咯。

故此一啲人士千祈咪亂講，今天之超支基建是不是下一代的負擔，答案係絕對否定，因為政府並非發行公債攞錢起大橋高鐵。

要再講多一次，如果實施工會派及社工派贊成嘅全民退保，先至會為80後90後帶來沉重負擔。第一，如果全民退保要全民供款，香港人口老化得快，生育率又低，將來退休人士多過在職工作人士，即是供款者少，領退休金者多，對今日35歲以下人士最唔着數；第二，如果唔駛供款，一切由政府常務開支支付，仲死得快，特區政府隨時會加稅，加重今天80後90後人士之稅務負擔。

香港啲社會膠，工會膠，左膠等等必須諗清楚，你哋反對基建，支持全民退保，左丁山冇意見，但若果佢哋認為基建加重下一代負擔，全民退保係保障老人福利，咁樣就要搞清楚錢從那裏來，唔好等到政府儲備乾塘時或自己不願交稅嚟支付上一代退休金時，先至後悔。安排退休，最重要都係靠自己，左丁山唔反對MPF，其實強積金每月供款不多，滾存40年（假設由25歲供到65歲退休）都唔會為打工仔帶來安穩退休生活，但係有一塊雞翼總係好過冇。MPF最緊要買股票基金，先至有機會擊敗通脹惡魔，每月供MPF之餘（其實不傷脾胃），自己最好亦定期定額每月買股票，以公用股及大型Reit或商業信託為主，買完長揸不動，懶理股市大上大落，買保本基金就一定跑輸大市。