林鄭月娥當選特首以來,理應做好交接工作嘅梁振英,疑似處處放蕉皮跣對方,例如林鄭話要擱置小三TSA,佢就急急撲出唱反調,好似唔想畀對方攞彩咁。距離梁特離任不足一個月,唔少政壇花生友估緊佢仲留低啲乜嘢蘇州屎畀奶媽收拾殘局?有人話取消強積金對沖呢筆數,689就係搵777幫忙找數。
當年勞工界支持梁振英,無非因為佢嘅政綱承諾逐步降低強積金對沖比率,佢喺任內最後一份施政報告終於提咗出來,隨即諮詢公眾3個月,打算6月卸任前敲定方案。之不過政府、商界、勞工三方面嘅要求,大纜一直扯唔埋,取消對沖問題始終膠著,而梁特早前喺答問大會被工聯會議員「追數」時未有明確回應,只稱會喺未來繼續努力處理,又話政府要提出一個讓勞方接受嘅方案雖然容易,但如果唔可以與資方達成共識,就算方案出台都難以繼續向前行喎。
花生友聽聞,勞工界覺得呢個說法暗示689走數呼聲高,但有商界人士唔係咁睇,話以689個性加上近期對林鄭嘅種種表現,極可能最終趕喺卸任前推個勞工界主導嘅方案都未定,屆時商界定必反晒枱,臨走都留個殘局畀奶媽收拾!
其實歷屆政府都唔掂對沖,因為知道呢個係商界喺勞工議題上守得最硬嘅一條線,所以梁特政綱提出後,有政府中人認為佢輕視問題嘅阻力及困難程度,事實證明佢上任後一直推唔到,最終拖無可拖先喺最後施政報告提出,呢個縮骨處理旨在對工聯會交差,扮兌現競選承諾,但實際執行仍然係下屆政府囉。